Ur skiantour.

Anavezout a rit Gregor Roc'h-Kongar, ar skiantour brudet a zo o chom e Lokmaria-Berrien., e Menez Are. Ne rit ket? Ma, ne gollit netra.

Ur skiantour meur eo marteze, met un den displijus eo ivez. Ne gomz ket ouzh e amezeien, rak ne gar ket an dud. Ne gar nemetañ e unan. Butuniñ a ra kalz ivez: atav e vez gant e gorn-butun en e c'henou, ha n'eus ket c'hwez vat ganto.

Er mare-mañ emañ oc'h ober ur robot. Gouzout a rit petra eo ar robotoù: ardivinkoù a labour en ho lec'h e-keit ha ma vezit o tiskuizhañ en ur sellout ouzh ur film skiant-faltazi er skinwel.

Ma, n'eo ket echu ar robot-se c'hoazh, met un anv zo bet roet dezhañ: Abgregor eo anvet. Bugel kentañ Gregor Roc'h-Kongar e vo. Ne vo ket graet gant kig ha gwad, a zo sur, met ur robot gant houarn hag eoul e vo. Ha ne vo ket klañv ken alies hag ur bugel, ha ne raio ket kement a drouz, neketa?

Janig.

Un eilerez en deus Gregor Roc'h-Kongar. Janig Pennognon eo hec'h anv. Plijout a ra ar skiantour dezhi, kit da gompren perak. Burzhud ar garantez marteze. Met siwazh, ar paour kaezh Janig ne blij ket dezhañ. Ne blij ket dezhañ peogwir e komz kalz, peogwir e vez diwezhat a-wechoù, ha peogwir eo un tammig tev. Petra a reoc'h? Gwir eo e tebr re a chokolad e-lec'h butuniñ ar c'horn. Ouzhpenn-se ne labour ket mat a-walc'h, hervez soñj an Aotrou Roc'h-Kongar.

Se n'eo ket gwir, rak ober a ra he seizh gwellañ atav.

Ne gredit ket?

N'hoc'h eus ken nemet gwelout : hiziv n'eo ket erruet diwezhat Janig en he labour.

Ar robot.

En arnodva emañ o komz gant Gregor Roc'h-Kongar.

« Aotrou kelenner, ha heñvel e vo Abgregor ouzh an dud all ?
- Ne vo ket; speredekoc'h e vo ha kreñvoc'h e vo ivez.
- Ha petra a zebro?
- Ar memes boued ha ni a zebro: bara ha kafe da lein, eveldomp. Nemet muioc'h a voued a zebro: tri lur vara hag ul litrad kafe a yelo gantañ, rak evañ a raio muioc'h egedomp ivez.
- Ha gallout a raio komz ?
- Ya, met komz a raio nebeutoc'h egedoc'h, ha kousket a raio nebeutoc'h egedoc'h ivez. Nebeutoc'h a fazioù a raio ivez, ha gwelloc'h e labouro, n'eus forzh penaos. Efedusoc'h egedoc'h e vo, ha muioc'h a arc'hant a c'honezin gantañ eget ganeoc'h.
- Petra e talvez ar c'homzoù-mañ, aotrou kelenner ?
- Janig, Abgregor a vo eiler ganin, labourat a raio muioc'h ha koustañ a raio nebeutoc'h egedoc'h. Kalz gwelloc'h e vo an traoù evel se, ne gred ket deoc'h ?
- Ha me neuze, aotrou kelenner, petra e teuin da vezañ?
- C'hwi ? Ac'hanta, laoskit-me da sellout ouzhoc'h ... Feiz, tevoc'h oc'h eget an dud all, hag Abgregor en devo muioc'h a naon eget n'eus forzh piv... Debriñ ac'hanoc'h a raio !
- Forzh ma buhez ! Forzh ma buhez ! » Ha n'eo ket bet adwelet Janed Pennognon e ti Gregor Roc'h-Kongar nag e bourk Lokmaria-Berrien abaoe an deiz-se.

Glac'har a garantez, a lavar an teodoù fall.